Youth Voices

Dyaar-e-Lahore (Nazm)

By Zahra Murghis


Image source: cities.wikia.com

Ravi ke kinarey ham basney waley

Data darbar ke ham hain rakhwaley

Pegham pyaar ka ham dainey waley

Dyaar-e-Lahore ke ham jo rehney waley

Data ki yeh jo soni nagri hai

Dil walon ki haan ye basti hai

Pehchan gham ki bhi yahan haqeeri hai

Dukh dard ki bhi yahan koi hasti hai?

Har seher yahan eid ki subh hoti hai

Har raat yahan chand raat hoti hai

Tareek shab mein yahan din ka ujaala hota hai

Har roz yahan ek naye tehwaar ka jashan hota hai

Seenon mein zinda kayi naik jazbey hain

Khuwaab se haqiqat banti kai tammanayen

Walwalon se yahan badli jati taqdeerain hain

Aabru peh watan ki,yahan jeeti jati jangain hain

Sadiyon ke wirsey yahan miltey hain

Shammain bhi noor ki yahan jalti hain

Tareekh ke memaar bhi miltey hain yahan

Muqaddar ke siqandar bhi bastey hain yahan

Zindagi ko zinda reh kar ham jeeney waley

Dushman se bhi mohabbat ki zuban bolney waley

Pegham pyaar ka haan ham dainey waley

Dyaar-e-Lahore ke ham jo rehney waley